नाशिक जिल्ह्यात भूकंपाचे धक्के; नागरिकांना सतर्कतेचे आवाहन ….
घाबरू नका, सतर्क राहा… प्रशासनाच्या अधिकृत सूचनांचे पालन करण्याचे आवाहन….
नाशिक : नाशिक जिल्ह्यातील विविध भागांत भूकंपाचे धक्के जाणवल्याच्या पार्श्वभूमीवर नागरिकांनी घाबरून न जाता सतर्क राहावे आणि सुरक्षिततेची काळजी घ्यावी, असे आवाहन करण्यात आले आहे.
भूकंपाचे धक्के जाणवत असताना नागरिकांनी खिडक्या, काचा, कपाटे आणि जड वस्तूंपासून दूर राहावे. शक्य असल्यास मजबूत टेबल किंवा अन्य सुरक्षित संरचनेखाली आसरा घ्यावा. धक्के सुरू असताना लिफ्टचा वापर करू नये तसेच घाईघाईने इमारतीबाहेर पडण्याचा प्रयत्न करू नये.
धक्के थांबल्यानंतर इमारतीपासून सुरक्षित अंतरावर मोकळ्या जागेत जावे. विजेच्या तारा, झाडे आणि धोकादायक किंवा कमकुवत बांधकामांपासून दूर राहण्याचे आवाहन करण्यात आले आहे.
दरम्यान, सोशल मीडियावर पसरणाऱ्या अफवा किंवा अप्रमाणित माहितीवर विश्वास ठेवू नये. नागरिकांनी प्रशासनाकडून मिळणाऱ्या अधिकृत सूचनांचे पालन करावे. तसेच लहान मुले, ज्येष्ठ नागरिक आणि दिव्यांग व्यक्तींची विशेष काळजी घ्यावी.
सतर्क राहा • सुरक्षित राहा • अफवांवर विश्वास ठेवू नका
सर्व नागरिकांनी शांतता राखून एकमेकांना सहकार्य करावे, असे आवाहन करण्यात आले आहे.
